ગુજરાતમાં નવરાત્રી પહેલા વરસાદી માહોલ રહેવાની આગાહી કરવામાં આવી રહી છે. હવામાન વિભાગ દ્વારા નવરાત્રીની શરુઆત પહેલા તથા નવરાત્રી શરુ થાય છે તે દિવસે પણ વરસાદ થવાની સંભાવના વ્યક્ત કરવામાં આવી છે. હવામાન વિભાગ દ્વારા ચાલુ અઠવાડિયામાં અમદાવાદ સહિત દક્ષિણ ગુજરાતમાં વરસાદ થવાની શક્યતાઓ વ્યક્ત કરવામાં આવી છે. બે પછી ચાલુ વર્ષે ઠેર-ઠેર નવરાત્રીના ભવ્ય આયોજનો કરાઈ રહ્યા છે. નવરાત્રીને લઈને યુવાનો પણ થનગનાટ જોવા મળી રહ્યો છે.
શું કહે છે હવામાન વિભાગની આગાહી?
હવામાન વિભાગ દ્વારા આજે વલસાડ સહિત દક્ષિણ ગુજરાતના જિલ્લામાં ભારે વરસાદ થવાની આગાહી વ્યક્ત કરી છે. જ્યારે ડાંગ, તાપી, નવસારી, દમણ, દાદરા નગર હવેલીમાં ભારે પવન અને વીજળીના કડાકા સાથે સાથે વરસાદ થઈ શકે છે.
શુક્રવારે પણ દક્ષિણ ગુજરાતના કેટલાક ભાગોમાં ગાજવીજ સાથે વરસાદ થવાની આગાહી વ્યક્ત કરવામાં આવી છે. આ દરમિયાન 30-40 કિલોમીટરની ઝડપે પવન પણ ફૂંકાઈ શકે છે. આ સાથે આણંદ, ખેડા, અરવલ્લી, દાહોદ, મહિસાગર અને પંચમહાલ તથા સૌરાષ્ટ્રના અમરેલી અને ગીર સોમનાથમાં હળવાથી ભારે વરસાદી ઝાપટાં થઈ શકે છે.
આ તારીખે અમદાવાદમાં વરસાદ થઈ શકે છે
તારીખ 24, 25 અને 26 દરમિયાન પણ વરસાદની આગાહી કરવામાં આવી છે. નોંધનીય છે કે 26મી તારીખથી નોરતાની શરુઆત થઈ રહી છે અને આ દરમિયાન સૌરાષ્ટ્રના અમરેલીઅને ગીર સોમનાથમાં વરસાદ થઈ શકે છે. શનિવારે અમદાવાદ સહિત આણંદ, ખેડા, પંચમહાલ, દાહોદ, મહિસાગરમાં હળવાથી મધ્યમ વરસાદ થઈ શકે છે. સૌરાષ્ટ્રના અમરેલી, ગીર સોમનાથ અને ભાવનગર તથા દીવમાં પણ આ દિવસે વરસાદ રહી શકે છે.
નવરાત્રીને લઈને આયોજકો અને યુવાનોમાં થનગનાટ
બે વર્ષ પછી તમામ છૂટછાટો સાથે નવરાત્રીનું આયોજન કરાઈ રહ્યું છે. પાર્ટી પ્લોટ અને ક્લબોમાં થતા ગરબા માટે કરાયેલી તૈયારીઓ હવે પૂર્ણ થવાના આરે છે, ઠેર-ઠેર ગરબાના મેદાનો પણ તૈયાર કરવાની કામગીરી ચાલી રહી છે. નવરાત્રીને લગતી ખરીદીમાં પણ ચાલુ વર્ષે તેજી જોવા મળી રહી છે. ગરબા ક્લાસમાં પણ આ વખતે શીખવા આવતા લોકોની સંખ્યા વધી છે. આવામાં વરસાદ વિઘ્ન ના બને તેવું આયોજકો અને ગરબા રસીકો ઈચ્છી રહ્યા છે.
