મારી સાસરીમાં ધાર્મિક પ્રસંગોએ માસિક લંબાવવા ગોળીઓ લે છે, તો શું આગળ જતા એનાથી નુકશાન થઇ શકે ??

GUJARAT

પ્રશ્ન : હું 26 વર્ષનો યુવક છું અને ટૂંક સમયમાં જ મારાં લગ્ન થવાનાં છે. હું હંમેશાં મારી પત્નીને ખુશ રાખવા ઇચ્છું છું તો આ માટે મારે શું કરવું જોઇએ? એક યુવક (ભાવનગર)

ઉત્તર : યુવતી જ્યારે લગ્ન કરીને સાસરે આવે છે ત્યારે તેના માટે દરેકે દરેક વ્યક્તિ અજાણી જ હોય છે. આ સમયે પતિ જો થોડી ધીરજથી કામ લેશે તો છોકરીને તેના પિતાના કરતાં પણ પતિનું ઘર વધુ પ્રિય થવા લાગશે. તમારી પત્નીને કોઈ પણ કામ કરવા માટે જબરદસ્તી ન કરો. પત્ની ઉપર કારણ વગર હુકમ કરવાનું ટાળો. તથા કોઈ પણ બહારની વ્યક્તિ સામે પત્નીની ઊણપો ન બતાવો.

પરિવાર તથા બહારના અગત્યના વિષયો ઉપર પત્નીની સલાહ લેવાનું રાખો તથા તેના સૂચનનો આદર કરો. પત્નીને પણ પોતાની વાત કહેવાની તક આપો. ઘર બનાવવું કે લગ્ન વગેરે જેવી બાબતોે ફાઈનલ કરતી વખતે પત્નીની ઈચ્છાનો પણ ખ્યાલ રાખો. પત્ની પ્રતિ હંમેશા ઈમાનદાર રહો. તમારી દરેક ભાવનાઓ પત્ની સમક્ષ વ્યક્ત કરો. તમારી કોઈ પણ ભૂલની પત્ની સમક્ષ પ્રેમથી માફી માંગી લો.

માફી માંગવાથી તમે પત્ની સામે નાના નહીં થઈ જાવ પણ પત્નીની નજરમાં તમારા માટે આદરનું પ્રમાણ વધી જશે. પત્નીના સગાસંબંધીને તમારા પોતાના સમજી માન-સન્માન આપો જેથી તમારા સગાસંબંધીને પણ તમારી પત્ની માન-આદર આપશે.

તમારા પોતાના વિચાર જે તમારી બહેન તથા દીકરી માટે છે તે જ તમારી પત્ની માટે પણ લાગુ કરવા જોઈએ. તમે જો એમ ઈચ્છતા હો કે તમારી બહેન કે દીકરી સમયાંતર તેના પીયર આવે તો પત્નીને પણ સમયાંતર વાર-તહેવારે પીયર મોકલવામાં આનાકાની ન કરો. પતિ-પત્નીના સંબંધ ક્ષણિક નથી, જન્મજન્માંતરના છે એટલે જેટલો સમય સાથે વિતાવશો તેમ તમે એકબીજાની વધુ ને વધુ નજીક આવતા જશો.

પ્રશ્ન : હું 24 વર્ષની પરિણીતા છું અને મારા હમણાં જ લગ્ન થયાં છે. માારા સાસરામાં મહિલાઓ ધાર્મિક પ્રસંગો અગાઉ ત્રણ-ચાર દિવસ પહેલાં માસિક લંબાવવા ગોળી લે છે. શું આ દવાઓથી મહિલાને નુકસાન કે આડઅસર થવાની શક્યતા ખરી? એક મહિલા (રાજકોટ)

ઉત્તર : માસિક લંબાવવા માટે બે પ્રકારની ગોળીઓ આવે છે: એક, બજારમાં મળતી સામાન્ય ગર્ભનિરોધક ગોળી અને બીજી ગોળીમાં માત્ર પ્રોજેસ્ટ્રોન હોર્મોન્સ હોય છે. માસિકસ્રાવ એસ્ટ્રોજન અને પ્રોજેસ્ટ્રોન હોર્મોન્સનું પ્રમાણ ઓછું થવાથી આવે છે.

જ્યારે આ ગોળી લેવામાં આવે ત્યારે હોર્મોન્સનું પ્રમાણ શરીરમાં વધે છે, જેથી માસિક આવતું નથી. ગોળી બંધ કર્યાના બે-ત્રણ દિવસમાં માસિક પાછું આવી જતું હોય છે. આ ગોળી અનિયમિત માસિકને નિયમિત કરવા માટે પણ વપરાય છે.

આ ગોળીથી અમુક લોકોને દવા લે ત્યાં સુધી ઉબકા આવે અથવા શરીરમાં પાણી ભરાવાથી સોજા અનુભવાતા હોય છે. બાકી કોઇ કાયમી આડઅડર જોવા મળતી નથી. દુનિયામાં લાખો સ્ત્રીઓ આ દવાનું સેવન કરતી હોય છે. પરંતુ આ દવા સ્ત્રી રોગ નિષ્ણાત ડોક્ટરના માર્ગદર્શન હેઠળ જ લેવી જોઇએ.

Leave a Reply

Your email address will not be published. Required fields are marked *