ટાટાના આ શેરમાં રોકાણકારોની પેઢીઓ તરી ગઈઃ એક લાખની સામે 169 કરોડ રૂપિયા મળ્યા

nation

શેરબજારમાં રોકાણકારો જ્યારે મૂડી રોકતા હોય ત્યારે તેઓ માત્ર રોમાંચ ખાતર રોકાણ નથી કરતા. તેઓ મલ્ટિબેગર વળતર મેળવવા માટે જોખમ ખેડતા હોય છે જેથી તેમનું ભવિષ્ય સુરક્ષિત થાય અને આગળ જતા કોઈ નાણાકીય તકલીફ ન પડે. જોકે, બહુ ઓછા સ્ટોક એવા હોય છે જે રોકાણકારને તેના જીવન દરમિયાન એટલું ઉંચું વળતર આપે કે તેની ભાવિ પેઢીઓ પણ તરી જાય છે. ટાટાની કંપની ટાઈટન (Titan Company) આવો જ એક સ્ટોક છે. એક સમયે આ શેરનો ભાવ માત્ર ત્રણ રૂપિયા હતો જે હવે વધીને રૂ. 2535 સુધી પહોંચ્યો છે.

જે રોકાણકારોએ બે દાયકા સુધી આ શેરમાં સારું એવું રોકાણ કરી રાખ્યું હોય તે કરોડોપતિ થઈ ગયા હશે તે નક્કી છે. તેનું કારણ છે કે વીસ વર્ષ અગાઉ આ શેરમાં એક લાખ રૂપિયા રોક્યા હોય અને અત્યાર સુધી ઈન્વેસ્ટમેન્ટ જાળવી રાખ્યું હોય તો આજે જેના 169 કરોડ થઈ ગયા હોત.

ભવિષ્યની પેઢીઓને પણ સદ્ધર કરી દેવા માટે આટલો નફો પૂરતો ગણાય કે નહીં? જૂન 2011માં આ શેર 10:1ના રેશિયોમાં સ્પ્લિટ થયો હતો જેના કારણે શેરહોલ્ડરો માટે શેરની ખરીદકિંમત 10મા ભાગની થઈ ગઈ હતી.

લાંબા ગાળાના સ્ટોક ઈન્વેસ્ટર્સ શેરના ભાવના વધારાથી નફો મેળવે છે એવું નથી, તેમની આવક વધારવા માટે બીજા રસ્તા પણ છે. ભલે પછી સ્ટોક વધતો ન હોય. રોકાણકારો વચગાળાના ડિવિડન્ડ, બોનસ શેર અને શેર બાયબેક દ્વારા પણ કમાણી કરી શકતા હોય છે. તેની સાથે સાથે શેર પણ વધતો જાય તો પછી તેનાથી વધારે સારું બીજું શું હોય?

Titanના શેરધારકોને ફાયદો એ છે કે તેણે બોનસ શેર પણ આપ્યા છે અને શેર સ્પ્લિટ પણ થયો છે. ટાઈટનનો શેર ત્રણ રૂપિયાથી વધીને રૂ. 2535 થયો એટલે કે છેલ્લા 20 વર્ષમાં આ સ્ટોકે 845 ગણો ઉછાળો નોંધાવ્યો છે. આ કંપનીએ એકની સામે એક બોનસ સ્ટોક પણ આપ્યો હતો.

બોનસ શેરના કારણે રોકાણકારોની કોસ્ટ પ્રાઈસ અડધી થઈ ગઈ હતી. આ શેર પહેલેથી સ્પ્લિટ થયો હતો અને 10મા ભાગની કિંમત થઈ ગઈ હતી. તેથી હવે વાસ્તવિક ખર્ચ માત્ર પાંચ ટકા રહ્યો. એટલે કે જેમણે ત્રણ રૂપિયાના ભાવે શેર ખરીદ્યો હતો તેને 10ની સામે એક શેરના સ્પ્લિટિંગ અને 1ની સામે એક બોનસ શેરના કારણે હવે આ શેર માત્ર 15 પૈસામાં પડ્યો હતો. તેથી એવું કહી શકાય કે 15 પૈસાનો શેર હવે વધીને રૂ. 2535 થયો છે. આમ બે દાયકામાં આ શેરમાં 16,900 ટકા વળતર મળ્યું છે.

Leave a Reply

Your email address will not be published.