મારા ઘરે આવતી કામવાળી મારા પતિ જોડે બેડરૂમમાં આરામથી સૂતી હતી અને મારા પતિ તેના હોઠ પર હોઠ રાખીને…

GUJARAT

ને હતું જ કે તમે આવશો. તમને જોઈ ખરેખર આનંદ થયો. તમે ખુબ સુંદર છો માનસી. ના ના, તમને ખુશ કરવા નથી કહ્યું, મારે આમેય તમને ખુશ કરવાની શું જરૂર છે? ઉલટાનું તમને પણ અંદેશો હશે કે અત્યારની આપણી મુલાકાત પછી કદાચ … એટલે, એમ ન સમજતા કે હું મસકા મારું છું. પણ તમે સાચે જ સુંદર છો. પાથવને તો લાંબા જ વાળ ગમે છે, છતાં તમારા વાળ ટૂંકા હોવા છતાં…આઈ મીન..તમે સુંદર જ છો ..પાથવની પ્રેરણા બની શકો એટલા સુંદર. પણ દરેકની સુંદરતાની વ્યાખ્યા અલગ હોય ને? આ તો પાથવની વ્યાખ્યા મને ખબર છે, અથવા હું એવું માનું છું કે મને ખબર છે. શું પ્રેરણા બનવા માટે સુંદરતા જરૂરી હોય છે? કદાચ હા, કદાચ ના. પણ કવિ હૃદય માટે સુંદરતા ઉદ્દીપકનું કાર્ય તો કરી જ શકે. અને દેખાય એ તો બાહ્ય સુંદરતા જ હોય છે ને? આંતરિક સુંદરતા તમને ક્યારે દેખાય? આઈ મીન…અનુભવાય? ચાલો, એ વાત છોડો.

તમને આંચકો લાગ્યો હશે મેં તમને આમ મળવા બોલાવ્યા. આજે જ તો પાથવના ગઝલ સંગ્રહનું વિમોચન છે, અને વળી વેલેન્ટાઈન ડે પણ છે. ના, ના, અકળાઓ નહિ. તમે આપણી મુલાકાત બાદ પાથવને પણ મળી લેજો. મેં ક્યારેય એને અટકાવ્યો નથી. જો કે હવે તો હું અટકાવું તો ય શું? પણ ખરું કહું છું, એવું અટકાવવું મારા સ્વભાવમાં જ નથી. એ ખુશ તો આપણે ખુશ. બસ, આટલી સીધી સાદી વાત હું તો સમજુ. તો હા, શું લેશો? તમને તો વિધાઉટ સુગર, બ્લેક કોફી ભાવે છે ને? આમ ન જુઓ. પાથવે મને તમારા વિષે ઘણી વાતો કરી છે. તમને કોફી ખૂબ ગમે છે, કોફી પીવાના સમયે તમે કોઈ ખલેલ ચલાવી નથી લેતા, કોફીના સ્વાદમાં કોઈ કોમ્પ્રોમાઇઝ નથી કરતા. અને … ગમે ત્યાં, ગમે તેવી કોફી પણ નથી પી શકતા. અહીની કોફી તમને ભાવશે. હા, હું ઘણું જાણું છું તમારા વિષે, તમારી પસંદગી વિષે કારણકે અમારી મિત્રતા હજુય અકબંધ છે, અને રહેશે. પાથવનું કેવું છે, એને જે ફિલ થાય ને, એ મને કહે નહિ ત્યાં સુધી મારી સાથે એ હળવો ન રહી શકે. અને મને તો એણે ઘણા સમય પહેલા જ આ વાત કરી હતી કે, આઈ મીન….પાથવ અને તમે..ના ના..હું કોઈ ખરાબ શબ્દ નહિ બોલું. તમે જ કહો ને? શું કહું તમારા સબંધ ને? પ્રેમ? આકર્ષણ? મોહ?

માનસી, આમ ન જુઓ મારી સામે. હું પાથવની પત્ની છું. સમાજે સ્વીકારેલા સબંધે એની અર્ધાંગીની. અને તમે? તમને કોઈ પૂછશે તો તમે શું કહેશો? પ્રેમિકા? એક પરણિત કવિની ડિવોર્સી પ્રેમિકા? આટલી મોટી લેખિકા અને એક ગઝલકારના સબંધ વિષે કોઈ પણ જાણવા માંગશે, અને તમે તો વળી ખુબ લોકપ્રિય પણ છો.લોકોને તમારા વિષે જાણવામાં રસ હોય જ. ત્યારે શું કહેશો? તમારી વાર્તાઓમાં આવતા સ્ત્રી પાત્રોની જેમ હિંમત બતાવી શકશો, કહી શકશો કે તમે પાથવને પ્રેમ કરો છો? કે પછી તમારી ચતુરાઈ ભરી શબ્દરમતની માયાજાળમાં પૂછનારને ગૂંચવી દેશો? આંખો ઝૂકાવવી એ કોઈ જવાબ નથી. આ શું? તમારી હથેળી કેમ બરફ જેવી ઠંડી થઇ ગઈ? ના, હું તમારા પર કોઈ શાબ્દિક વાર કરવા નથી આવી. મારે તો તમને ફક્ત એટલુ જ કહેવું હતું, પાથવ વિષે, જે કદાચ તમે નહિ જાણતા હોવ. વ્યંગમાં હોઠ ન મરડો. શક્ય છે, તમારા સબંધમાં આ વાત સુધી હજુ તમે ન પહોંચ્યા હોવ. પણ, પાથવ અસ્વિકૃતિ અને જુઠાણું જરાય સહન નથી કરી શકતો.

એનું લખાણ જેટલું સરળ અને સાચું છે, એટલો જ એનો અહં પણ. હા, તમને કદાચ ખબર પણ હોય, છતાય કહું છું. તમારા કોઈ ઈન્ટરવ્યુંમાં આવા પ્રશ્નનો જવાબ તમે શું આપશો એ તમારે અત્યારે નક્કી કરવું પડશે. તમે એકલા છો. ડિવોર્સી છો. તમારા પરિવારમાં કદાચ તમારા કોઈ પણ ઉત્તરથી કોઈ ફરક નહિ પડે. પણ તમેં જે કંઈ ઉત્તર આપશો એ પાથવ માટે ખુબ મહત્વનો છે, અને પાથવ મારા માટે. આ પ્રશ્ન હું એક લેખિકા નથી પૂછી રહી, મારા પતિની જિંદગીની બીજી સ્ત્રીને પૂછી રહી છું. તમારી આવનારી જીંદગીમાં તમે પાથવને શું આપી શકશો? એના માટે શું જતું કરી શકશો? તમને ખબર છે, એને જ્યારે રડવું આવે છે ને, ત્યારે….અરે….નવાઈ ન લગાડો. રડે નહિ? પુરુષ છે તો શું? સંવેદનશીલ તો છે ને? એ મારે તમને કહેવાનું થોડું હોય? અફકોર્સ તમે જાણતા જ હશો. હા, તો એને જ્યારે રડવું આવે ને ત્યારે એને મા બનીને સાચવવો પડે છે. ખોળામાં માથું રાખી માથે હાથ ફેરવી સુવડાવવો પડે છે. ક્યારેક હાલરડું પણ ગાવું પડે છે. હસો નહિ, ખરું કહું છું! ધૂની લોકોની કોઈ પણ વાત વિચિત્ર ન લાગવી જોઈએ, અને તમને તો ખાસ! શું કહ્યું? તમે ધૂની નથી? બહુ સરસ. મને ગમ્યું. તો જ તમે એને સાચવી શકશો ને! એટલે… ક્યારેક તમારી સાથે હોય અને રડે એવું પણ બની શકે ને?

તમને તો ખબર જ હશે ને કે એ જ્યારે ચા પીતો હોય અને સાથે જ બીજું કોઈ ચા સિવાયનું કઈ પણ પીતું હોય તો એમાં એ ચા રેડી દે છે? મને તો ચા વાળું બોર્નવીટા પીવાની આદત પડી જ ગઈ છે, તમે પણ ચા વાળી કોફી ચાખી હશે ને? શું કહ્યું? તમને નથી ખબર? વાંધો નહિ. આજે તો ખબર પડી ને? આ તો શું કે આવનારી ઘટનાઓ તમને આંચકાઓ ન આપે. હા, તમારી પ્રિય કોફી સાથે તમારે કોમ્પ્રોમાઈઝ કરવો પડશે. થશે ને? શું કહ્યું? અત્યાર સુધી પાથવે આવું નથી કર્યું? મતલબ કે અત્યાર સુધી તમારી સાથે સંયમ રાખ્યો છે. ઘણો સંયમ…બાકી એ સંયમનો માણસ નથી. તમે તો જાણતા જ હશો. હા, સમજી શકું છું. ઘણીયે મુલાકાત તમારા ઘરે, એકાંતમાં થઇ હશે. તો ત્યારે ચા કોફીની ભેળસેળ થઇ જ નથી શું…? ઓકે..ઓકે..જવાદો. હું જરા અંગત એરિયામાં પ્રવેશી ગઈ. બહાર નીકળું…

ના,ના. એવું જરાય ન માનતા કે હું એને છોડી રહી છું. કારણકે હું જાણું છું, એ મારા વિના ન રહી શકે. અભિમાન નથી કરતી પણ હું એની આદત છું. એની આદતોને મેં પાળી પોષી છે. અને એના આ કવિ મિજાજને સ્થિરતા ન મળે ત્યાં સુધી બાળક ન લાવવાનો પણ મારો જ નિર્ણય છે. તમે તો સમજો છો ને, બાળક આવવાથી કેટલી જવાબદારીઓમાં બંધાઈ જવું પડે? હા, તો…મુખ્ય વાત પર આવીએ.

મારે તમને ફક્ત એટલું જ કહેવું છે, પાથવ તમારા સબંધને સ્વીકારી ચુક્યો છે. કદાચ એના પુસ્તક વિમોચનમાં તમારા વિષે પ્રશ્ન આવે તો એ ખોટું નહિ બોલે. તમે એ માટે તૈયાર છો? એના જવાબ પછી તમારી સામે આવનારા તમારા બે વિશેના પ્રશ્નો માટે તમે તૈયાર છો? કાલે ઉઠીને પત્રકારોએ કે પછી તમારા આટલા બધા ફેનમાંથી કોઈએ જાહેરમાં પૂછયું તો તમે શું કહેશો એ મારે નથી જાણવું. પણ તમારે એ જાણી લેવું જોઈએ કે તમે શું કહેશો. એના જે પણ ઉત્તરો તમે આપશો, એના પરિણામ માટે પણ તમે તૈયાર છો? તમારા અને પાથવના સંબંધ વિષે વખત છે ને મને પણ કોઈ પત્રકાર બે સવાલ પૂછશે. હું શું કહીશ, એ મને તો ખબર જ છે, પણ તમને નથી ખબર. હું કહું એ અને તમે કહો એ સાવ જુદું હોય એ પણ બરાબર ન ગણાય. આ નવલકથા નથી કે રીરાઈટ કરી લેવાય, જિંદગી છે.

તમારા પતિની લાઈફમાં બીજી સ્ત્રી તમે સહન ન કરી શક્યા અને એ બાબતે જ છુટા છેડા લીધા. અને પાથવની લાઈફમાં તમે શું છો? અકળાઓ નહિ. મને જવાબ નથી જોઈતો. તમે ખુદને જવાબ આપો. અસમંજસમાં ન રહો. તમે ઈચ્છો તો પાથવ સાથે વાત કરી શકો, અત્યારે જ..ફોન કરું? ઓકે. ઓકે..મારી સામે કદાચ સંકોચ થાય. પણ હવે તમારે આ વિષે નિર્ણય તો લેવો પડશે ને? તમારા પતિ તો એ બીજી ી સાથે સેટ પણ થઇ ગયા છે, પણ હું પાથવને ક્યારેય નહિ છોડું. તમે આ બીજું સ્થાન સ્વીકારી શકશો? તમારી જાત માટે? સમાજ માટે? પાથવ માટે? પ્રેમ કર્યો છે, કોઈ ગુનો નથી જ. અને હું પણ કઈ તમને સજા સંભળાવવા નથી આવી. પણ તમે પુરતું વિચારી લો.

Leave a Reply

Your email address will not be published.