રાજ્યમાં આજે કેટલાક જિલ્લામાં વરસાદની આગાહી છે. જેમાં ભારે પવન સાથે કેટલાક ભાગોમાં વરસાદ પડી શકે છે. તેમજ હવામાન વિભાગે ગાજવીજ સાથે વરસાદની કેટલાક વિસ્તારોમાં આગાહી કરી છે. તેમાં મધ્ય ગુજરાત, દક્ષિણ ગુજરાત અને સૌરાષ્ટમાં વરસાદની આગાહી કરવામાં આવી છે.
પવનની ગતિ 30 થી 40 કિલોમીટર પ્રતિ કલાક રહેશે
ઉલ્લેખનીય છે કે પવનની ગતિ 30થી 40 કિલોમીટર પ્રતિ કલાક રહેશે. તેમજ અમદાવાદ, આણંદ, વડોદરા, ભરૂચ, સુરત, વલસાડ, નવસારી, તાપી, રાજકોટ, ભાવનગર, પોરબંદરમાં પણ આગાહી છે. ગુજરાતમાં તા.7 જૂનને મંગળવારથી પ્રિ-મોન્સુન એક્ટિવીટી શરૂ થઈ ગઈ છે. દક્ષિણ ગુજરાત અને સૌરાષ્ટ્રના વિવિધ વિસ્તારમાં છેલ્લા પાંચ દિવસથી છુટો છવાયો વરસાદ પડી રહ્યો છે. બીજી તરફ ચોમાસાએ મુંબઈમાં એન્ટ્રી લઈ લીધી છે
ત્યારે ગુજરાતમાં ચોમાસાના આગમનના પડઘમ વાગવા લાગ્યાં છે. હવામાન ખાતાના જણાવ્યા મુજબ શનિવાર સાંજથી આગામી 36 કલાક અને રવિવાર સવારથી આગામી ચોવીસ કલાકમાં દક્ષિણ ગુજરાતથી ચોમાસુ એન્ટ્રી લે તેવી શક્યતાઓ છે. મોટાભાગે તા.15થી 20 જૂનની વચ્ચે દક્ષિણ ગુજરાતના વલસાડથી ગુજરાતના ચોમાસાનો પ્રારંભ થતો હોય છે પરંતુ હાલના સંકેતો પ્રમાણે જો આગામી 36 કલાકમાં ચોમાસાની એન્ટ્રી થશે તો આ વખતે ત્રણ-ચાર દિવસ વહેલુ ચોમાસાનું આગમન થયુ તેવુ કહી શકાશે.
અમદાવાદ, આણંદ, વડોદરા, ભરૂચમાં પણ આગાહી
હવામાન ખાતાએ કરેલી આગાહી મુજબ અમદાવાદ, ગાંધીનગર, ખેડા, આણંદ, પંચમહાલ, દાહોદ, મહિસાગર તેમજ સૌરાષ્ટ્રના ભાવનગર, બોટાદ, રાજકોટ, ગીર સોમનાથ, જુનાગઢ, અમરેલી, સુરેન્દ્રનગર અને દીવમાં ગાજવીજ સાથે હાળવો વરસાદ પડવાની શક્યતાઓ છે. કેરળમાં ચોમાસાનું આગમન થયા બાદ ગુજરાતમાં વાદળો ઘેરાવાના શરૂ થતા હોય છે અને તેના એક સપ્તાહ બાદ ગુજરાતમાં પ્રિ-મોન્સુન એક્ટિવીટી શરૂ થતી હોય છે.
આ વખતે કેરળમાં 1લી જૂન પહેલા ચોમાસાનુ આગમન થયુ હતુ અને 1લી જૂનના રોજ કેરળમાં પ્રવેશેલુ ચોમાસુ કર્ણાટક સુધી પહોચી ગયું હતુ, જે ગોવા થઈને શુક્રવારે રાત્રે મુંબઈમાં એન્ટર થયું હતું. જેની એન્ટ્રી સાથે મુંબઈમાં ગાજવીજ સાથે અનેક વિસ્તારમાં ધોધમાર વરસાદ શરૂ થયો હતો. મુંબઈમાં પ્રથમ દિવસે જ વીજળીના કડાકા સાથે વરસાદનો પ્રારંભ થતાં જ ગુજરાતમાં 48 કલાકમાં ચોમાસાની એન્ટ્રી થવાના શનિવારે સવારે જ હવામાન ખાતા દ્વારા સંકેતો અપાયાં હતા.
