દિલદાર હતો સિદ્ધાર્થ શુક્લા, લોકડાઉનમાં પ્રત્યુષા બેનર્જીના પિતાને પૈસા મોકલીને મદદ કરી હતી

BOLLYWOOD

ટીવી એક્ટર અને બિગ બોસ 13ના વિજેતા સિદ્ધાર્થ શુક્લાના એકાએક નિધનથી તેના ફેન્સ શોકમાં છે. ગુરુવારના રોજ સિદ્ધાર્થે અંતિમ શ્વાસ લીધા અને શુક્રવારના રોજ તે પંચતત્વમાં વિલીન થઈ ગયો. સિદ્ધાર્થના પરિવાર, ટીવી ઈન્ડસ્ટ્રીના લોકો તેમજ ફેન્સ માટે હજી પણ આ વાત અવિશ્વસનીય છે. સિદ્ધાર્થ માત્ર એક સારો એક્ટર નહોતો, તે ઘણો સારો મિત્ર હતો અને દિલદાર માણસ હતો. સિદ્ધાર્થ શુક્લાએ દિવંગત અભિનેત્રી પ્રત્યુષા બેનર્જીના પરિવારની લોકડાઉનના સમય દરમિયાન મદદ પણ કરી હતી.

સિદ્ધાર્થ શુક્લાએ જેની જોડે છેલ્લે કામ કર્યું હતું તે અભિનેત્રીએ લખી ભાવુક પોસ્ટ
ઉલ્લેખનીય છે કે સિદ્ધાર્થ શુક્લાએ પોપ્યુલર ટીવી શૉ બાલિકા વધુમાં કામ કર્યુ હતું. આ શૉમાં તેની કો-સ્ટાર પ્રત્યુષા બેનર્જી હતી, જેનું નિધન થઈ ગયું છે. પ્રત્યુષના પિતા શંકર બેનર્જીએ એક ઈન્ટર્વ્યુમાં જણાવ્યું કે, સિદ્ધાર્થ શુક્લા સતત તેમના સંપર્કમાં હતો અને લોકડાઉન દરમિયાન તેણે પરિવારને પૈસા પણ મોકલ્યા હતા.

સિદ્ધાર્થ શુક્લાના નિધન પર શંકર બેનર્જીએ જણાવ્યું કે, મને ખબર નથી પડતી આમ કઈ રીતે થઈ ગયું. હું તેને પોતાનો દીકરો સમજતો હતો. બાલિકા વધૂ દરમિયાન સિદ્ધાર્થ અને પ્રત્યુષા ઘણાં સારા મિત્રો બની ગયા હતા. તે અમારા ઘરે પણ આવતો હતો. પ્રત્યુષાના મૃત્યુ પછી ઘણાં લોકો મારી દીકરી અને સિદ્ધાર્થના સંબંધો વિષે વાત કરતા હતા. માટે સિદ્ધાર્થે ઘરે આવવાનું બંધ કરી દીધુ હતું. પરંતુ તે મેસેજથી મારી સાથે વાત કરતો હતો.

શંકર બેનર્જીએ આગળ જણાવ્યું કે, આ લોકડાઉન દરમિયાન પણ સિદ્ધાર્થ સતત મારી સાથે ફોન પર વાત કરતો હતો. થોડા મહિના પહેલા તેનો અંતિમ મેસેજ મને મળ્યો હતો. તે મેસેજમાં પૂછતો હતો કે અંકલ અને આંટી હું તમારી કોઈ મદદ કરી શકુ છું? શું તમે લોકો ઠીક છો? એક વાર તેણે મને જબરદસ્તી 20,000 રુપિયા મોકલ્યા હતા.

સિદ્ધાર્થ શુક્લાનું ગુરૂવારે સવારે હાર્ટ એટેકના કારણે નિધન થયું હતું. શુક્રવારે મુંબઈના ઓશિવરા સ્મશાનગૃહમાં તેના પરિવાર અને નજીકના મિત્રોની હાજરીમાં સિદ્ધાર્થના અંતિમ સંસ્કાર કરવામાં આવ્યા હતા. તેના અંતિમ સંસ્કારમાં શેહનાઝ ગિલ, અસિમ રિઝવી, આરતી સિંહ, રશ્મી દેસાઈ, નિક્કી તંબોલી, વિકાસ ગુપ્તા, અલી ગોની, પ્રિન્સ નરૂલા, યુવિકા ચૌધરી, રાખી સાવંત, અભિનવ શુક્લા, અર્જુન બિજલાની, કરણવીર બોહરા અને રાહુલ મહાજન સામેલ હતા. ઉલ્લેખનીય છે કે, સિદ્ધાર્થને ટીવી શો બાલિકા વધૂથી ખાસ્સી પ્રસિદ્ધિ મળી હતી. થોડા વર્ષો પહેલા જ બાલિકા વધૂની એક્ટ્રેસ પ્રત્યુષા બેનર્જીએ આપઘાત કર્યો હતો. તેના અંતિમ સંસ્કાર પણ ઓશિવારાના સ્મશાન ગૃહમાં જ કરવામાં આવ્યા હતા.

Leave a Reply

Your email address will not be published. Required fields are marked *